جامعہ بنوریہ عالمیہ اس بات کو اپنی ذمہ داری سمجھتا ہے کہ ملکی وقومی سالمیت اور تحفظ کو سامنے رکھتے ہوئے ایسے طلبہ تیار کیے جائیں ، جو وطن عزیز کے وقار اور اس کے تشخص کو ہر قیمت پر برقرار رکھنے کیلیے ذہنی طور پر چوکس اور چاق و چوبند رہیں۔ دین اسلام کے دفاع کیلیے بین الاقوامی پس منظر میں عالمی سطح پر ہونے والی سازشوں اور منفی پروپیگنڈے کا موثر جواب دے سکیں۔ اس پس منظر میں اگر حالات کا جائزہ لیا جائے تو یہ معلوم ہوگا کہ الحمدللہ تقریبا تمام دینی مدارس انہیں خطوط پر درس نظامی اور مختلف تخصصات میں ایسے ہی طلبہ تیار کررہے ہیں۔

جامعہ بنوریہ عالمیہ کو یہ اعزاز حاصل ہے کہ اس نے درس نظامی کے ساتھ ساتھ تخصصات کی تمام جہتوں میں بھی انقلابی پیش قدمی کی ہے اور اب جامعہ بنوریہ عالمیہ کا یہ عزم ہے کہ اپنے فاضلین، متخصصین اور درس نظامی کرنے والے علمائے کرام کیلیے ایک سالہ پروگرام ’’آن لائن تخصص فی الفقہ والافتاء ‘‘ پیش کیا جائے ۔ اس سلسلے میں ’’جامعہ بنوریہ آن لائن اسلامک ایجوکیشن ‘‘ کے ماہرین کی مشاورت سے دنیا بھر سے مستفید ہونے والے علمائے کرام کیلیے ایک معیاری نصاب تیار کیا گیا ہے، جسے ان شاءاللہ متعلقہ شعبہ جات کے ماہر اساتذہ کی زیرنگرانی شروع کیا جارہا ہے۔ امید واثق ہے کہ ان شاءاللہ یہ ادارہ پوری دنیا میں دینی علوم کی نشرو اشاعت بین الاقوامی معیار کے مطابق ماہر متخصصین تیار کرے گا۔